SAPU EIS OPTREDE TEEN SAMESWEERDERS
Die Suid-Afrikaanse Polisievereniging, SAPU, sê persone wat moontlik saamgesweer het teen die geskorsde nasionale polisiekommissaris, generaal Fannie Masemola, moet aanspreeklik gehou word.
Dit volg nadat die Nasionale Vervolgingsgesag, die NVG, opdrag gegee het dat vier aanklagte teen Masemola teruggetrek word. Die aanklagte het verband gehou met die oortreding van die Wet op Openbare Finansiële Bestuur.
SAPU se woordvoerder, Lesiba Thobakgale, doen ’n beroep op president Cyril Ramaphosa om Masemola onmiddellik weer as nasionale polisiekommissaris aan te stel.
Thobakgale sê aanspreeklikheid moet ook volg teenoor diegene wat volgens SAPU vir die aanklagte verantwoordelik was, asook persone binne die SAPD wat moontlik betrokke was by pogings om Masemola uit sy pos te verwyder.
Hy sê Masemola se terugkeer kan volgens SAPU stabiliteit binne die polisie bevorder en help om vertroue tussen die SAPD en gemeenskappe te versterk, veral in aanloop tot die plaaslike regeringsverkiesings.
