SAPD WAARSKU GEMEENSKAP OOR TOENAME IN AANLYN- EN BANKBEDROG
Die Suid-Afrikaanse Polisiediens (SAPD) in die Namakwa- distrik waarsku inwoners teen ’n toename in aanlyn- en bankbedrog, veral op platforms soos Facebook Marketplace.
Volgens die polisie lok misdadigers slagoffers met produkte wat teen onrealisties lae pryse geadverteer word. Kopers word versoek om vooruit per EFT te betaal, waarna die verkoper verdwyn en geen goedere gelewer word nie.
Nog ’n algemene bedrogspul behels persone wat hulself as bankamptenare voordoen. Slagoffers word meegedeel dat daar ’n probleem met hul rekening is, waarna hulle gevra word om PIN- nommers , eenmalige wagwoorde ( OTP’s ) of ander vertroulike bankbesonderhede te verskaf.
Die SAPD beklemtoon dat geen wettige bank ooit kliënte telefonies vir sulke inligting sal vra nie.
Die publiek word aangemoedig om versigtig te wees, geen vertroulike inligting te deel nie, en verdagte transaksies onmiddellik by hul bank en die polisie aan te meld.
