DA vra provinsiale ingryping oor kragkrisis in Koingnaas
Die Demokratiese Alliansie doen 'n dringende beroep op die Noord-Kaapse LUR vir Samewerkende Regering, Bentley Vass, om by die voortslepende elektrisiteitskrisis in Koingnaas in te gryp.
Volgens die DA is inwoners en ondernemings reeds 36 dae sonder elektrisiteit nadat 'n hoëspanningskabel op 27 Junie beskadig is. Die party sê die langdurige kragonderbreking het 'n groot ekonomiese en maatskaplike impak op die dorp, met besighede wat inkomste verloor en gesinne wat finansieel swaarkry.
Die DA beweer die Kamiesberg Plaaslike Munisipaliteit beskik nie oor die nodige tegniese kundigheid om die beskadigde kabel te herstel nie en voer aan dat die gemeenskap vertroue in die munisipaliteit se vermoë verloor het. Die party verwys ook na die munisipaliteit se onlangse finansiële uitdagings nadat die Nasionale Tesourie fondse teruggehou het weens beweerde finansiële wanbestuur.
